(84) 西餐班一

期待已久的西餐班終於開始左啦！
今次五金妹踩過界，去洋務工會學煮西餐（點解唔係飲食工會既？）。導師係蒲達棠先生，係大尾篤開左間大自然環保餐廳。為人風趣，令上堂氣氛相當輕鬆愉快。
第一堂學的菜色是：焗帶子孖士薯，和西班牙汁豬扒。
雖然這個西餐班是工聯會主辦的，收費便宜，但用料十足。好似帶子甘，真係見佢大大粒，豬扒又真係成條連住脊骨甘即場切出來。但雖則這個是實習班，因人數眾多（１９人左右），所以有時只能分工合作，有些步驟只係有得睇，無得試做。至於五金妹，昨日就負責洗魚，拍鬆豬扒，被老師點左出去表演分蛋白同埋蛋黃的絕技，同埋自己煎豬扒，仲俾老師讚煎得靚添！但我發覺其他同學仔個個身懷絕技，刀法非凡。例如同組的男同學，切青紅椒時手起刀落，每條椒絲的闊度均等，似乎並非尋常人家！
其實今次最主要學到的是點樣做魚白汁，荷蘭汁同埋西班牙汁。唔知返屋企是否可以成功做到，但我會努力去嘗試的。但上下一堂前，我必先要習慣一下老師的用詞．．．例如他習慣把毫升講成克，但更離譜的是把克講成厘米，教人嘖嘖稱奇。

(用貝殼"莊"住來焗的帶子孖士薯)

( 西班牙汁豬扒)